कोयी सोबत रो चाय मत रो
पळन मनंच नेता को….

म केरी सांबळेंवाळो छेनी
म लूनी समजन केनी
म केनीच मानपान दूनी
म मनेरो मालक छूनी
जेनं कायी वाटंच वाटे दो
पळन मनंच नेता को….|१|

म कींव जकोनच वेयीचाय खरो
म कायीच करूनी से तमच करो
सेरे आंग नाम रेयीचाय मारो
भलेयी तम काम करन मरो
जे जारेच जेन जाय दो
पळन मनंच नेता को…|२|

करचं जेन करे देयेसंनी
सोता पूढाकार लेयेसंनी
बलावं वोत तू आयेसंनी
केरी लारं लारं जायेसंनी
भूके छं जेनं भूकेच रेय दो
पळन मनंच नेता को…..|३|

तार म” पणेंती से दूर वेरे
तोनं सेचं आचोबला केरे
आरे जको बी घर जान सोरे
कटाळगे से वागणूकीती तारे
संघटना फक्त कागदेपरच रेय दो
पळन मनंच नेता को…..|४|

निरंजन बळीराम मुडे